अमेरिका जान महिनौं जोखिमपूर्ण यात्रामा हिंडेकाहरूमध्ये सबै गन्तव्यमा पुग्दैनन् । कतिले बीच बाटोमै ज्यान गुमाउँछन् । गैरकानुनी रूपमा अमेरिका छिर्न खोज्दा दक्षिण अमेरिकी क्षेत्रका जंगल, समुद्र र बाटोमा मृत्युवरण गर्नेहरूको दृष्टान्त ।
दुई वर्षअघि घर छोड्दै गर्दा रुकुम मुसिकोटकी लीला बोहराले श्रीमान्लाई रोक्न खोजिन् । अनि माया भरिएको भावमा सम्झाएकी थिइन्– ‘घरमा साना बच्चा छन्, टाढाको बाटो यत्तिकै न हिंड्नुस् !’
तर गाउँ छिरेको अमेरिका जाने लहरले उनका श्रीमान् रमेश गौतमलाई रोक्न सकेन । सेनाको जागिर, श्रीमती र घरमा दुई साना सन्तान छोडेर उनले गाउँका युवाले जस्तै अमेरिका जान अवैध बाटो समाए ।
