मुस्ताङ, नेपाल — जलवायु परिवर्तनका कारण नेपालभरि असर पर्न थालेको छ भने हिमाली जिल्ला मुस्ताङ विशेष प्रभावित भएको छ। यसैबिच, मुस्ताङको घरपझोङ गाउँपालिका अध्यक्ष मोहनसिंह लालचनको नेतृत्वमा भदौ ३१ गते जलवायु सम्मेलन आयोजना हुने भएको छ।
लालचनले मुस्ताङजस्तो शुष्क क्षेत्रमा जलवायु परिवर्तनले पारेको प्रत्यक्ष असरबारे निरन्तर आवाज उठाउँदै आउनुभएको छ। उहाँका अनुसार, “जलवायु परिवर्तनले तराईदेखि हिमालसम्म असर पुर्याएको छ। अब देशभरका जनप्रतिनिधिहरू एकजुट भई समस्याको साझा समाधान खोज्नु अत्यावश्यक छ।”
अध्यक्ष लालचनको योजनाअनुसार सम्मेलनमा देशभरका ७५३ पालिकाबाट करिब ३ हजार प्रतिनिधि सहभागी हुने अपेक्षा गरिएको छ। सहभागीलाई मार्फा, जोमसोम, स्याङ र ठिनीका होटल तथा होमस्टेमा बसोबासको व्यवस्था मिलाइएको छ।
सम्मेलनपछि “घरपझोङ जलवायु घोषणापत्र” जारी गरिनेछ, जसमा सहभागीहरूले जलवायु संरक्षणका लागि साझा प्रतिबद्धता जनाउनेछन्। आयोजकको विश्वास छ कि अध्यक्ष लालचनको यस नेतृत्वदायी पहलले स्थानीयदेखि अन्तर्राष्ट्रिय स्तरसम्म जलवायु परिवर्तनबारे ध्यानाकर्षण गर्नेछ।
